Marek Krawc rozprawja wo aktualnje rozjimanych temach w Čěskej

Praha. Ukrainski prezident Wolodymyr Zelenskyj poby minjeny štwórtk a pjatk w Praze a zetka so ze swojim kolegu w zastojnstwje Petrom Pavelom kaž tež z čěskim ministerskim prezidentom Petrom­ Fialu. Hakle krótko do toho bě čěske knježerstwo zjawnosć wo wopyće Zelenskeho informowało. W srjedźišću wobšěrnych rozmołwow steještej dalša pomoc a móžne přiwzaće nadpadnjeneho kraja do NATO. „Myslu sej, zo budźe wjeršk zakitowanskeje aliancy we Vilniusu wulkotna składnosć, móc a njebojaznosć pokazać. Ukraina wočakuje jasny signal a konkretne kročele, NATO přistupić móc. Trjebamy motiwaciju, trjebamy sprawne mjezsobne styki“, podšmórny Zelenskyj po swojim zetkanju z čěskim prezidentom. Přiwzaće do NATO traje swój čas; tuchwilu je wšěm jasne, zo móže so to hakle po kóncu wójny započeć. „Zahajenje přijimanskich rozmołwow je tež w našim zajimje, dokelž tyje wěstosće, regionalnej stabiliće a hospodarskemu rozrostej“, je prezident Petr Pavel přeswědčeny.