Marek Krawc rozprawja wo aktualnje rozjimanych temach w Čěskej
Praha. Krótko do hód kontroluja zastojnicy čěskeho lěsnistwoweho zarjada husćišo swoje přestrjenje z młodymi jehlinowcami, zdźěli zastupjer statneho předewzaća. Chcedźa tomu zadźěwać, zo sej ludźo „darmotnje“ swoje hodowne štomy wobstaraja. Nimo toho popryskachu hajnicy jehlinowcy z wosebitej kapalinu, kotraž ma poprawom skoru młodych štomow před sornami a jelenjemi škitać. W ćopłej stwě póčnje chemikalija smjerdźeć, štož je tohorunja najlěpši škit před paduchami. Na swojich internetnych stronach informuje čěski lěsnistwowy zarjad, zo móža sej ludźo čerstwe šmrěki a jědle za płaćiznu mjez 90 a 300 krónami (3,70 do 12,25 eurow) kupić.
