Přiwisnicy dotalneho pólskeho knježerstwa so nowej politice wobaraja

Waršawa. Start noweho knježerstwa w Pólskej je wobćežny. Wosebje wo medije howri horcy a zasakły bój. Zamołwići a žurnalisća, kotřiž běchu dotalne narodno-konserwatiwne knježerstwo strony Prawo a sprawnosć (PiS) podpěrowali a opoziciju po swojich mocach wočornjeli, nochcedźa swoje dźěłowe městno nowemu knježerstwu ministerskeho prezidenta Donalda Tuska přewostajić. Bój wo medije saha hač k ćělnym rozestajenjam w redakcijach a před nimi. Strona PiS nowemu knježerstwu wumjetuje, zo njezakonsce jedna. Prezident Andrzej Duda mjenowaše to anarchiju. Ludźo mjeztym tež wědźa, zo su sej zamołwići žurnalisća swoju swěrnu słužbu na dobro knježerstwa PiS z hoberskimi sumami pjenjez zapłaćić dali, kaž z namakanych mzdowych podłožkow wuchadźa. Knježerstwo PiS bě sebi přichilene medije wulkomyslnje podpěrowało. Polakam je to hotowy šok.