Pólske knježerstwo planuje modernu železnisku syć a nowe lětanišćo

Waršawa. Pólska ma wotpohlad, nowe moderne lětanišćo na kromje stolicy Waršawy twarić. Wotpowědne plany je ministerski prezident Donald Tusk předwčerawšim, srjedu, na nowinarskej konferency w swojej kencliji předstajił. Lětanišćo ma kmane być za 34 milionow pasažěrow wob lěto. Nastać ma na terenje městno za 135 pasažěrskich lětadłow. Nowy airport wobstejacu syć lětanišćow wudospołnja, Tusk w tym zwisku zdźěli.

Předewzaće za nowe lětanišćo bě hižo předchadźace knježerstwo PiS měło. Te wšak chcyše wo wjele wjetši objekt za nic mjenje hač 100 milionow pasažěrow zwoprawdźić. Nowe knježerstwo je plany předźěłało a pomjeńšiło, Tusk rozłoži. Při tym dźe jemu tež wo to, wobydlerjow njetrjebawši njepoćežować: Trěbne su zdobom přesydlenja a w nuzy samo wuswojenja. Kóšty projekta trochuja na 131 miliardow złotych (33 miliardow eurow). Bywši ministerski prezident Mateusz Morawiecki je w sejmje zaměr Tuska nablaku jako „karikaturu“ kritizował.