Marek Krawc rozprawja wo aktualnje rozjimanych temach w Čěskej

Praha. Zjawno-prawniska Čěska telewizija tłóči na kritiskich žurnalistow a spyta, jich negatiwnje wobwliwować, zdźěli wobydlerska iniciatiwa „Milion chwilkow za demokratiju“ minjenu póndźelu. Iniciatiwa njeje přezjedna z rozsudom zjawneho medija, inwestigatiwne wusyłanje „168 hodźin“ z programa šmórnyć. We wusyłanju wotkrywaja žurnalisća skandale abo rozestajeja so z přeńdźenjemi politikarjow. Hižo wot lěta 2006 hlada přerěznje 533.000 přihladowarjow prawidłownje kritiske přinoški „168 hodźin“. 3500 reportažow je so hač dotal njepřijomnym prašenjam wěnowało. Přiwšěm je Jan Souček, generalny intendant Čěskeje telewizije njedawno wozjewił, zo chce wusyłanje „168 hodźin“ po wulkich prózdninach z programa wzać. Zastupjerjo iniciatiwy su znjeměrnjeni situacije w Čěskej telewiziji dla a prašeja so Součeka w zjawnym lisće, hač a hdy planuje, podobne reportaže wo palacych temach w towaršnosći wusyłać. Nimo toho je wobydlerska iniciatiwa zwěsćiła, zo su dalše podobne publicistiske formaty wohrožene.