Praha. Sakski kontaktny běrow, zaměstnjeny w Praskim Serbskim seminarje, je zašły tydźeń wot štwórtka hač do soboty druhi raz na dworje domu sakske hodowne wiki organizował. Prěni raz wotmě so tele zarjadowanje hižo před pjeć lětami, a poprawom chcychu z tutej nowej atrakciju kóžde lěto pokročować. Tomu pak bě koronapandemija zadźěwała, tohodla bu planowana nowa tradicija najprjedy přetorhnjena. Hakle lětsa je so poradźiło, po planje pokročować, štož je so wudaniło, wšako móžeš po zakónčenju eventa prajić: Wuslědk bě wulki wuspěch.