Zakitowanscy ministrojo pjeć europskich krajow wuradźowali

Waršawa (dpa/SN). Němska chce zhromadnje ze štyrjomi dalšimi europskimi partnerami ukrainsku brónjowu industriju w boju přećiwo Ruskej zesylnić. „Hdyž pjenjezy tu su, hdyž su kapacity zawěsćene, potom je Ukraina sama najbóle kmana, swoje wojerske jednotki z brónjemi a materialom zastarać“, rjekny zakitowanski minister Boris Pistorius (SPD) na kóncu zetkanja ze swojimi kolegami z Pólskeje, Francoskeje, Wulkeje Britaniskeje a Italskeje w nakromnej štwórći pólskeje stolicy Waršawy. Dźensa je Pistorius do Kijewa dojěł.

Móžnosće zhromadneho dźěła z Ukrainu na polu wobrónjenja njejsu dotal ­wučerpane, rjekny pólski zakitowanski minister Władysław Kosiniak-Kamysz. Wo tym su tež z ukrainskim zakitowanskim ministrom Rustemow Umjerowom rěčeli, kiž bě z widejom přizamknjeny. „2025 ma so z lětom wutwara brónjen­skeje industrije w Europje stać“, Kosiniak-Kamysz rjekny. Europa měła pokazać, zo njemóže jenož zhromadne předstawy citować, ale zo je tež přesadźi.