Dubiozne podawki wokoło předsydy PiS zaběraja pólske statne rěčnistwo
Waršawa. Politiska kriminalka wosebiteho razu pólsku zjawnosć tele dny zaběra. Wuchadźišćo je njejapka smjerć Barbary Skrzypek. Wona bě 30 lět nawodnica běrowa předsydy narodno-konserwatiwneje strony Prawo a sprawnosć (PiS) Jarosława Kaczyńskeho a zdobom jeho sekretarka a dowěrnica. Minjeny kónc tydźenja su ju pochowali. Što bě so stało?
Za čas swojeho politiskeho knjejstwa bě sej Kaczyński w lěće 2019 předewzał, stajić sej cyle swojorazny wosobinski pomnik. Wosrjedź Waršawy měještej nastać hoberskej 190 metrow wysokej wěži. Jako dwójnikaj dyrbještej wonej jeho wosobinu kaž tež tu 2010 smjertnje znjezboženeho bratra Lecha Kaczyńskeho symbolizować. Plany běchu hotowe a w medijach prezentne. Projekt pak zwrěšći, dokelž je jón Waršawska měšćanska rada wotpokazała. Štož zwosta, běchu pjenježne problemy. Hižo za čas planowanja jewjachu so rozprawy wo dubioznych podawkach w zwisku z akcijowym towarstwom, kotrež měješe projekt financować a zwičnić.
