Při kejžorskim nazymskim wjedrje kaž hižo loni wotmě so spočatk požnjenca w Biskopicach pjaty wosebity běh ze zadźěwkami pod hesłom „Schiebock läuft extrem“ po 4 km dołhim kołokursu Biskopičanskeho měšćanskeho parka podłu rěki Wjazeńcy (Wesenitz).
Na tutym kołokursu z mnohimi a lětsa dalšimi nowymi zadźěwkami dyrbjachu běharjo swoju spěšnosć, wutrajnosć a wosebje tež wušiknosć na štyrjoch abo wosom kilometrach dopokazać. Atleća startowachu jednotliwje, stajnje we wotstawku sydom sekundow.
Na 4 km je 499 starterow (mjez nimi 260 žónskich) swoje koło zmištrowało, na 8 km wojowaše 240 atletow (z tych 68 běharkow), štož běše rekordne wobdźělenje z 837 atletami. Aktiwni běchu hłownje ze Sakskeje a z Braniborskeje a mjez nimi wubědźowaše so tež zaso horstka serbskich entuziastow, a to hłownje na 8 km. Najspěšnišej na kołokursomaj běštaj Adolf Swen (0-See-Sport/38:35 min) a Sophia Masur ze Załomja (44:48 min).