Sokoł Ralbicy/Hórki – Póst Germania Budyšin 3:1 (0:0)
Zestawa domjacych: Schöne – Matka, J. Bjeńš, Šewc, Budar, Šołta, Rawš, Korjeńk, G. Kurjat, M. Kurjat (70. Bejmak), Domaška
Hry přećiwo Budyšanam su stajnje jara horce, wšako hajitej wobě mustwje poměrnje robustnu kopańcu dwubojow. W prěnich mjeńšinach pak wone přewulku rólu njehrajachu. Wobaj teamaj spytaštej přez dołhe třělwy swojich ofensiwnych sobuhrajerjow docpěć, škitarjo stajnje lěpje stejachu. W 20. min. hosćo prěni raz prawje kombinowachu a hižo prasny bul prěni raz na žerdź – wulke zbožo za Sokołow. Jenož pjeć mjeńšin pozdźišo třepotaše tež aluminij na tamnym boku. Tomaša Rawšowa třělwa ze 16 metrow pak puć do wrotow njenamaka. Po dalšich pjeć mjeńšinach bu wrotar Sokoła Willi Schöne pruwowany, jako pospyt Budyšana z distancy hišće runje tak znješkódni. Krótko do połčasa wuhra Domaška w šěsnatce štyrjoch přećiwniskich koparjow, dalšeho pak njepřewiny.