To a tamne (02.07.15)
Cyłu blešu wódki wupił a na to sej wusnył je paduch we wobchodźe w Stühlingenje njedaloko badensko-württembergskeho Waldshuta. Policija jeho nańdźe, po tym zo bě alarmowa připrawa reagowała. Wokoło paducha ležachu cigarety, serp za zahrodu a tyza sprayja za włosy. Dalša bleša wódki bě rozbita. 41lětny bě so přez zachodne durje do wobchoda zadobył. Zastojnicy jeho zajachu.
K hotowej bijeńcy psyčeho howna dla je w sewjerorynsko-westfalskim Bergisch-Gladbachu dóšło. Psyk 32lětneje bě w měšćanskim parku hromadku zawostajił. 33lětna sej po informacijach policije wot njeje žadaše, zo ma zawostajenstwo zrumować. Bjez wuspěcha. Žonje na so bjakaštej. Na to zlećachu kluče do hłowy wobsedźerki psa, kotraž sej pomocnikow wobstara. Na kóncu so pjeć wosobow biješe, doniž policija njepřijědźe.
To a tamne (01.07.15)
Chěžu twarjacy roboter je awstralske předewzaće wuwiło. Po informacijach firmy z města Perth trjeba mašina z mjenom „Hadrian“ runje dwaj dnjej, zo by wonkowne murje domu stajiła. Z 28 metrow dołhej teleskopowej ruku móže tysac cyhelow wob hodźinu kłasć. Dźěło wotběži dospołnje awtomatisce. W běhu lěta chcedźa 150 domow z roboterom natwarić. Firma hižo dźesać lět na swojim rewolucionarnym nastroju dźěła.
Na awtodróze běhaca kóčka je šoferku na A4 w Durinskej k přewšo zwažliwej pomocnej akciji pohnuła. Po informacijach policije žona na nabóčnej čarje zasta a spyta najebać wulki wobchad wustróžane zwěrjo popadnyć, kotrež bě sej na srjedźne wobhrodźenje awtodróhi wućeknyło. Při tym žona jězdnju dwójce přeprěči. Skónčnje pak wołaše policiju wo pomoc, a wona kóčku popadny.
To a tamne (30.06.15)
Z 72 lětami maturu wobstał je rentnar Robert Spieß we Wiesbadenje. Wčera přepodachu jemu na statnej šuli za dorosćenych wuswědčenje. Z nětko zdobytej powšitkownej wysokošulskej zrałosću (přerězk 2,5) chce Spieß w Mainzu žurnalistiku studować. Za tónle masterski studij wšak trjeba wuměnkar hišće akademiski schodźenk bachelora. Nětko pak chce so najprjedy wot napinanja maturitnych pruwowanjow wočerstwić, kaž wón rjekny.
Kradnjeny mobilny telefon w spódnich cholowach paducha namakała je policija w Bremenje. Dokelž měješe 19lětny hišće dalšej telefonaj při sebi, jeho zastojnicy zajachu. 23lětna wobsedźerka bě zastojnikow wołała, po tym zo bě jej 19lětny telefon pokradnył. Z pomocu wěstotneje software woni zwěsćichu, zo je paduch w tramwajce, kotruž zadźeržachu.
To a tamne (29.06.15)
W boju přećiwo psyčim hownam we wjacorych městach chutnje wo tym rozmysluja, hač njezarjaduja datowy skład DNA jednotliwych psow. W Londonje chcedźa klětu pilotowy projekt k tomu zahajić. Tak móhli psa a jeho wobsedźerja zwěsćić. Mjeztym su tež w měšćanskej radźe w měsće Leichlingen pola Kölna wo tym diskutowali. Londonski projekt w Berlinje tohorunja z wulkim zajimom sćěhuja.
Žortny internetny widejo z psom za wodźidłom mopeda móhł za jeho wobsedźerja we Vietnamje chutne sćěhi měć. Policija mjeztym za mužom pyta. Jemu hrozy pokuta hač do 320 dolarow. Nimo toho ma jězbnu dowolnosć na dwaj měsacaj a moped na měsac wotedać. W filmje je widźeć, kak muž wosrjedź jězby w Hanoiju wodźidło pušći a psyk moped něhdźe poł mjeńšiny wodźi.
To a tamne (26.06.15)
Na dnje poprjancoweje tyzy je Berlinjan spytał, w Nižozemskej kupjene drogi do Němskeje pašować. 39lětny pak zastojnikam při kontroli busa při němsko-nižozemskej mjezy pola Leera napadny, a tak jeho wosobinske wěcy dokładnje kontrolowachu. Pod poprjancami namakachu 70 gramow heroina a 10 gramow kokaina. Policija muža zaja.
Grawoćiwy napohlad skićeše so sobudźěłaćerjam zwěrjatownje w bayerskim Bad Aiblingenje, jako chcychu 20 wulkich myši wotewzać, dokelž bě jich wobsedźer do chorownje přišoł: Na wšě 300 wulkich myši pak w bydlenju muža žiworješe, w faškach kamorow, pod łožom a za kamorami, „a wšitke běchu hłódne“, zwěrjatownja zdźěli. Muž bě sobudźěłaćerjam rjekł, zo wobsedźi 20 myši.
To a tamne (25.06.15)
Paket z 13 žiwymi hadami je awstralska policija sćazała. Pašowanje reptilijow bě so při rutinowej kontroli w mjezynarodnej rozdźělerni pósta w Melbournje wukopało. Paket pochadźeše z Indoneskeje. Kaž awstralski ratarski zarjad zdźěli, su hady morili.
Zo by swojeho njepřijomneho něhdyšeho lubowarja skónčnje wotbyła, je žona z Delnjeje Sakskeje zhromadnje z mandźelskim krawne mordarstwo inscenowała. Wona lehny so na špundowanje, da so z kečupom namazać a fotografować. Foto pósła něhdyšemu lubowarjej, kiž ju hižo dlěje z mejlkami a intimnymi fotami přesćěhowaše, dokelž chcyše so wjećić. Jako muž foto wuhlada, alarmowaše policiju, kotraž „wopor a skućićela“ žiweju namaka.
To a tamne (24.06.15)
Při rjedźenju woknow tčacy wostałoj staj mužej w Berlinje. Sobudźěłaćerjej rjedźenskeje firmy dźěłaštaj nad zemju we wysokosći wosmeho poschoda twarjenja Axela Springera, jako so gondla hižo njehibaše. Fachowcy za wuchowanje ludźi z wulkeje wysokosće jeju wuswobodźichu. Z powjazami pušćichu wobeju na hłubje ležacu třěchu. Hač dyrbještaj wonaj po tym dale dźěłać, njeje znate.
Dospołnje nahi je muž w Ludwigshafenje paducha dosahnył, kiž bě so do jeho awta zadobył. Alarmowa připrawa jězdźidła 44lětneho w nocy wubudźi. Bjez toho zo by so zdrasćił, smaleše muž za 17lětnym paduchom, kiž je hladajo na bližaceho so naheho ćeknyć spytał. Muž pak jeho přewiny a dźeržeše, doniž policija njepřijědźe. Rubiznu dósta wróćo.
To a tamne (23.06.15)
Nowe zasadźenje za stare policajske uniformy: Něhdźe 150 zelenych kombinowanych woblekow za motorskich su po naćiskach studentow modoweho designa z Hannovera na wjace hač 500 modernych tobołow předźěłali. Tak nastachu mjez druhim etwije za mobilne telefony, nachribjetniki a pućowanske toboły. Delnjosakski nutřkowny minister Boris Pistorius (SPD) wudźěłki wčera prezentowaše, mějo je za „cool“. Toboły zhotowjeja w dźěłarni zbrašenych. Wunošk je za załožbu, kotraž dźěło zbrašenych podpěruje.
Prěni króć w swojich 117lětnych stawiznach chce Hamburgski wjesłowanski klub Germania nětko tež žonam zmóžnić do kluba zastupić, pišu Hamburgske nowiny. Nastorčiło wšak bě to měšćanske zarjadnistwo. Wone wjaza spěchowanske srědki za twar noweho kluboweho domu na tele wuměnjenje.
To a tamne (22.06.15)
Miliony ludźi po wšěm swěće su so składnostnje wčerawšeho joga-dnja na zjawnych ćěłozwučowanjach wobdźělili. Jeničce w indiskej stolicy New Delhiju zhromadźi so po oficialnych informacijach 37 000 ludźi, štož chcedźa samo do Guinnessoweje knihi rekordow zapisać. UNO bě loni na namjet Indiskeje 21. junij jako swětowy dźeń jogi deklarowała. 5 000 lět stara filozofiska wučba polěkuje nutřkownej harmoniji čłowjeka kaž tež runowaze z přirodu.
Najdlěšu pizzu swěta su w Italskej napjekli. 80 kucharjow bě so sobotu na swětowej wustajeńcy w Milanu zhromadźiło, zo bychu 1,59 kilometrow dołhu a pjeć tonow ćežku pizzu margheritu spřihotowali. Zastupnik Guinnessoweje knihi nowy swětowy rekord wobkrući. Titul za najdlěšu pizzu měješe dotal Španiska z 1,1 kilometrom. Za italsku pizzu trjebachu nětko 2,5 tonow muki, 1,7 tonow mozzarella a 1,5 tonow tomatow.
To a tamne (19.06.15)
Dlěje hač tydźeń je swójba z Hornjeje Frankskeje na popjelnicu zemrěteho nana čakać dyrbjała, dokelž Němski póst stawkuje. Paket z popjelnicu bě w centralnej rozdźělerni w bayerskim Neunkirchenje am Brand ležo wostał, dokelž jenož jedyn z cyłkownje 14 póstownikow dźěłaše. Dźensa dopołdnja su popjelnicu přepodali. Wotpósłali běchu ju srjedu tydźenja njedaloko Lipska.
Kupać so kaž w 19. lětstotku móža so ludźo wot dźensnišeho na biedermeierskim přibrjohu Schladitzskeho jězora njedaloko Lipska. Tamniše pobrjóžne towarstwo chce wječor lětnje zawjeselenje zahajić. Nimo kupanja poskića na přibrjohu tež koncerty a reje. Dźensa wočakuja tam wosebiteho hosća: Tež sakski premier Stanisław Tilich (CDU) chce sej kupanje w biedermeierskej modźe wobhladać.
