To a tamne (09.03.17)
Po 960 dnjow trajacej swětowej jězbje z oldtimerom nawróći so přichodnu njedźelu prominentna 79lětna předawarka awtow Heidi Hetzer zaso do Němskeje. 24. julija 2014 bě sona wona ze swojim ameriskim oldtimerom z lěta 1930 do Azije, Awstralskeje a Nowoseelandskeje dale přez Sewjernu a Južnu Ameriku do Afriki nastajiła. Dožiwiła je, kaž sama praji, wšudźe wutrobnu hospodliwosć a wjesołych ludźi.
Wopačny wopor wupytał je sej rubježnik z dwěmaj pomocnikomaj w Berlinje. Po nadpadźe na 23lětneho muža prošeše tón naraz policiju wo pomoc. Jako wopor mjenujcy rubježnistwo pytny, ćěrješe roznjemdrjeny za paduchom, kiž dósta prawdźepodobnje paniku. Z telefonatom na policiju wšak so wón zdobom přeradźi. A ta jeho nachwilnje zaja.
To a tamne (08.03.17)
Cyle njewočakowano wjeseli so bywši jaty Budyskeje chłostarnje nětko nad swobodu. Zawčerawšim dyrbješe 46lětny poprawom na postajenu jastwowu terapiju drogow a alkohola dla. Mylnje pak bu z jatby pušćeny. Kaž nawoda chłostarnje Bernhard Beckmann zdźěli, bě to čłowječe zaprajenje. Za psychisce napadnym mužom dotal bjez wuspěcha pytaja.
Wopita šoferka awta chcyše minjeny kónc tydźenja policiji napowědać, zo je samodruha. Jako ju mjenujcy zadźerža, 28lětna twjerdźeše, zo dyrbi brjušebolenja po najspěšnišim puću domoj. Do toho bě přez tři čerwjene ample jěła. Dokelž žona na swojej stawizničce wobstawaše, dowjezechu ju na přepytowanje do chorownje. Tam wšak so wukopa, zo njebě samodruha, ale měješe 1,4 promile alkohola w kreji.
To a tamne (07.03.17)
Ze žołdka nopawy su skótni lěkarjo w Thailandskej nimale 1 000 twjerdych pjenjez wuoperowali. Tajke mjetaja tam ludźo do hatow, štož ma zbožo a dołhe žiwjenje přinjesć. Kaž uniwersitna klinika Chulalongkorn w Bangkoku zdźěli, je pjeć skótnych lěkarjow w běhu šěsćhodźinskeje operacije z 59 kilogramow ćežkeho zwěrjeća cyłkownje 915 twjerdych pjenjez wuwzało. Po tym zo běchu pjenjezy ze žołdka won, móže nopawa nětko zaso wjele lěpje dychać.
Wulka nakup mineralneje wody je 22lětnemu w badensko-württembergskim Laupheimje pjenježne chłostanje načiniła Ze šěsćstow połdraliterskimi blešemi a hišće dwěmaj sobujěducymaj bě jeho awto prosće přećežke. Policija pak jeho zadźerža a napołoži jemu chłostanku. Wodu bě młody muž tunjeho poskitka dla kupił.
To a tamne (06.03.17)
Skerje njezwučenu spansku městnosć je sej 25lětny w delnjofrankskim Sennfeldźe wupytał. Tak nańdźe jeho wohnjowa wobora wčera rano tři metry wysoko na hałzy štoma. Kaž so wukopa, bě wěstotny personal diskoteki młodeho muža sobotu wječor chětro wopiteho z lokala wuzamknył. Kak pak je so na štom dóstał, to muž wčera hižo njewědźeše.
Njezranjeny zražku z awtom přežiwił a samo hišće jako tak mjenowany slepy pasažěr sobu jěł je zajac w badensko-württembergskim Winnendenje. Šoferka jězdźidła bě sobotu na policajskim rewěrje njezbožo z dźiwinu přizjewiła. Jako zastojnicy awto wčera dokładnje za slědami přepruwowachu, nańdźechu zajaca za prědnjej storkawu, hdźež bě so zapopadnył. Skónčnje policisća jeho njezranjeneho wuswobodźichu a na městnje na swobodu pušćichu.
To a tamne (03.03.17)
Wukubłanc Berlinskeje policije je z kradnjenymi wěcami wikował. Mjeztym wšak je suspendowany. Kriminalna policija bě jeho jako skućićela wuslědźiła, po tym zo bě w kantinje policajskeje šule pokradnjenu drohu kameru předać spytał a dalše kradnjene wěcy we wuwěšku poskićał. Jako ciwilnaj zajimcaj staj policistaj 20lětneho zajałoj, jako tón jimaj kameru na předań poskići.
Štóž so w sudniskej žurli zadźeržeć njemóže, dyrbi z chłostanku ličić. Wyše krajne sudnistwo w Oldenburgu je nětko rozsud hamtskeho sudnistwa w Leeru wobkrućiło. Žona wupraji jako swědka w jednanju, w kotrymž bě muž ranjenja ćěła dla wobskorženy. Jako toho bratr wupraji, so jemu žona stajnje zaso wótře směješe, komentujo jeho wuprajenja ze słowomaj „to njetrjechi“. Dokelž časćiše napominanja sudnicy njepomhachu, napołoži jej chłostanku 150 eurow.
To a tamne (02.03.17)
Pokład slěbornakow su při twarskich dźěłach w pincy w Jenje namakali. Po informacijach krajneho zarjada za pomnikoškit a archeologiju jedna so wo 75 twjerdych pjenjez, kotrež běchu w keramiskim sudobju w špundowanju pincy składowane. Najstarši z nich ma wobraz španiskeho krala Philipa II. z lěta 1563. Najmłódši pjenjez pochadźa z Hannoverskeho wulkowójwodstwa z lěta 1710. Prawdźepodobnje jedna so wo zabyty schow z časa, jako bankow hišće njebě. Sudobjo su namakali, jako w pincy domu betonowe špundowanje kidachu.
Ottifant – znate wabjenske logo sewjeroněmskeho komikarja Otta Walkesa, debi wot wčerawšeho wosebitu 70centowsku listowu znamku. „To bě přeco hižo mój són, so raz na listowej znamce zwěčnić móc. Nětko měješe Němski póst skónčnje samsnu mysličku. To wšak bu tež čas“, rjekny Walkes nowinarjam. Comicowy elefant je dlěje hač 40 lět markowe znamjo mjeztym 68lětneho Walkesa.
To a tamne (01.03.17)
Sprawna duša: Ručnu tobołku z wjace hač 14 600 eurami je žona na jednej ze stacijow Mnichowskeje spěšnoželeznicy namakała a policiji přepodała. 39lětna bě na swojich narodninach wosamoćenu tošku na ławce wuhladała. Policija móžeše wobsedźerku, kiž bě zastojnikow hižo alarmowała, spěšnje zwěsćić. Poprawom chcyše 40lětna hosćencarka dochody dnja na banku donjesć, ta pak bě karnewala dla hižo zawrjena.
Štyri tony mandlow a sultaninow su njeznaći z nakładneho awta při awtodróze A 9 w Hornjej Frankskej pokradnyli. Z Pólskeje přijěduce awto bě minjeny kónc tydźenja na parkowanišću wotstajene. Paduši planu jězdźidła wočinichu a su, bjez toho zo by to něchtó pytnył, sydom paletow z mandlemi a sultaninami w hódnoće wjacorych tysac eurow wotkładowali.
To a tamne (28.02.17)
Při rjedźenju swojeho awta z milionarom stał je so starc w awstralskim měsće Newcastle. Muž, kiž chce anonomny wostać, nańdźe zabyty lotowy lisćik, kotryž hižo lěto w jězdźidle ležeše. Jako jón w interneće přepruwowa, wón zwěsći, zo je zrazom wo 1 020 496,38 awstralskich dolarow bohatši. Muž prawidłownje loto hraje, njeje pak hišće ženje dobył. Pjenjezy chce wón nětko za wukubłanje swojich wnučkow nałožić.
Rańše mloko dźěćom kradnył bě tydźenje dołho muž w delnjosakskim Hagenburgu. Wot spočatka lěta je sej tam stajnje póndźelu a štwórtk wotstajene połne mlokowe sudobja před dwěmaj pěstowarnjomaj sobu brał. Wčera je policija skućićela na městnje njeskutka lepiła. Kaž 38lětny twjerdźeše, chcyše so jenož strowy zežiwić, za čož pak jemu pjenjezy njedosahachu.
To a tamne (27.02.17)
W bydlenju swojeje prawowki randalěrował je 16lětny w Porynsko-Pfalcy, dokelž internet njefungowaše, 78lětna žona z Weilerbacha bě drje spěšny internetny přistup skazała. Tón pak chcyše fachowc hakle spočatk tydźenja přizamknyć. Dokelž w tym času žadyn přistup k internetej móžny njebě, započa młodostny pjatk wječor cychnować. 78lětna ćekny z bydlenja a zawoła policiju. Zastojnicy dowjezechu młodostneho k jeho wowce. Hač je tam internet fungował, njeje znate.
Pytajo za swojim bydlenjom je so pjany póstniski nora w Augsburgu do bydlenja susoda zadobył. Mějićel bydlenja słyšeše, kak něchtó wokno rozbije. W kupjeli wuhlada wón susoda w kostimje róžojteho zajaca. Tón pak móžeše ćeknyć. Policija namaka muža skónčnje we łožu swójskeho bydlenja. Tež tam bě wón durje z nohu rozbił.
To a tamne (24.02.17)
Podružnicy njesmědźa na balkonach swojich bydlenjow štomy sadźeć. Tole potwjerdźa Mnichowske hamtske sudnistwo w dźensa wozjewjenym wusudźe. Podružnik bě na balkonje swojeho bydlenja wosrjedź Mnichowa před 15 lětami hórski klon do hornca sadźił. Mjeztym je štom chětro narostł a je daloko widźeć. Wšitke namołwy wobsedźerki domu, jón wotstronić, muž dotal ignorowaše. Nětko je wona skoržiła.
Do wonjaceho mjasa zapakowane staj pašowarjo z Awstralskeje pjenjezy bjez cła do wukraja dowjezć chcyłoj. Z mjasom chcyštaj policajske psy na lětanišću w Adelaide za nós wodźić. Jedyn z nich pak reagowaše. Zastojnicy namakachu 375 000 eurow we wačokach muži. Wobeju pašowarjow zajachu.
