To a tamne (26.01.17)
Z nudlowym kulečkom w ruce je 35lětny swojej mandźelskej na pomoc chwatał. 27lětna žona bě so na parkowanišću w badensko-württembergskim Leutkirchu ze šoferom nakładneho awta do włosow dóstała, dokelž bě jej ze swojim wozydłom awto zastajił. Žona zawoła mandźelskeho, kiž bě z nudlowym kulečkom spěšnje na městnje a jón za wodźerjom Lkw-ja ćisny. Hakle policija móžeše rozkoru skónčić.
Dokelž bě 57lětny muž cyrkwinskej zwonaj pokradnył, ma so wón nětko před zarjadniskim sudnistwom w mecklenburgsko-předpomorskim Demminje zamołwić. Kónc lěta 2015 bě wón něhdźe sto kilogramow ćežkej zwonaj z kěrchowow w Dahmenje a Hohenbrünzowje pokradnył a jej do swojeho bydlenja we vogtlandskim Markneukirchenje dowjezł, hdźež je policija loni w lěću njewšědnu rubiznu našła.
To a tamne (25.01.17)
Přemało a tola přewjele tankował je šofer na awtodróze A 3 pola delnjofrankskeho Helmstedta. Po tym zo bě z awtom falowaceho bencina dla stejo wostał, wołaše wón policiju wo pomoc. Přiwołani zastojnicy, kotrymž pak alkoholowa wóń napadny, naměrichu pola muža 1,08 promilow. Wón ma nětko z pokutu a ze zakazom jězdźenja ličić.
Z paslemi spytaja zamołwići zwěrjenca w Gelsenkirchenje twochnjeneho rysa (Luchs) zaso popadnyć, kiž bě kónc tydźenja přez zamjerznjenu rěku ćeknył. Zwěrjenc z toho wuchadźa, zo je rys hišće blisko. Při pytanju picy měri so tón hłownje na sorny a nukle. Tež kóčki a mjeńše psy bychu so za žratwy hodźeli. Zwěrjenc tuž ludźom radźi, na swoje kóčki a psy kedźbować. Hač so rys woprawdźe na hońtwu poda, njeje jasne. Wutraje dźě, je-li trjeba, tež cyły tydźeń bjez picy.
To a tamne (24.01.17)
Wopity šofer awta je so w Saksko-Anhaltskej do wjace hač 50 kilometrow dołheje honjeńcy z policiju dał. Tři policajske jězdźidła su awto ćěkaceho minjenu nóc po awtodróze A 38 pola Halle přesćěhali. Hakle po wjace hač połsta kilometrach so jim poradźi ćěkaceho zadźeržeć. Dokelž so tón chětro wobaraše, dyrbjachu jemu ruce sputać. Alkoholowy test wunjese wjace hač 1,8 promilow. Zastojnikam bě napadnyło, zo jědźeše awto seklojte linije a so wobhrodźenja dótkaše.
Po dlěje hač 30 hodźinach trajacej wótrej hudźbje přez 35lětneho su ludźo w Podstupimje policiju wołali. Muža namakachu policisća pod wliwom drogow w kupanskej wani sedźaceho. Dokelž njebě durje wočinił, skazachu zastojnicy zamkarja. Na to hudźbu hasnychu a drogi sćazachu. Kriminalna policija nětko přećiwo mužej přepytuje.
To a tamne (23.01.17)
Cyły měsac bě wón zhubjeny – nětko su kocora Merlina žiweho z kanalizacije wućahnyli a wobsedźerce přepodali. Wčera bě pěška w Leutenbachu pola Stuttgarta mjawčenje z kanalizacije słyšała a policiju wo pomoc prosyła. Policistka zalěze na to do štyri metry hłubokeho kanala a kóčku wuswobodźi. 29lětna wobsedźerka za Merlinom hižo wot srjedź decembra pytaše. Za to je samo lětaki rozdźělowała. Na jich zakładźe móžachu žonu nětko spěšnje zwěsćić.
Małoawto Polski Fiat 126p chcedźa pólscy fanojo ameriskemu filmowemu hrajerjej Tomej Hanksej darić. Awto su hižo kupili, zo móhli je ponowić, rjeknychu organizatorojo akcije w Bielsku-Białej powěsćerni PAP. Hanks bě při nahrawanju filma „Inferno“ tajki wóz wužiwał a so do njeho zalubował. W Pólskej běchu Fiat hač do lěta 2000 twarili.
To a tamne (20.01.17)
Njewšědny policajski škit stej małej dźěsći w Lipsku dóstałoj. Jeju 35lětnu mać bě wčera chorobne awto nuznje do kliniki dowjezło, zo by tam porodźiła. Zo njebyštej samej wostać trjebałoj, doniž njejstaj dźěd a wowka z Durinskeje přijěłoj, so policistaj wo njej staraštaj. Jedyn ze zastojnikow, sam hakle wot njedawna młody nan, dwulětneho fachowsce pjelchowaše. Tamny zaběraše so z pjećlětnym bratrom. Potom so hrajkachu, doniž dźěd a wowka njedojědźeštaj.
Skazanka na sudniske jednanje jězdźenja bjez dowolnosće dla bě to jeničke, štož měješe šofer wosoboweho awta na awtodróze A 43 při sebi, jako jeho policisća zadźeržachu. Přewodźachu jeho na parkowanišćo, dokelž bě za wodźidłom telefonował. Wón pak njeměješe ani wupokaz ani jězbnu dowolnosć při sebi. Město toho pokaza list sudnistwa. Jězbnu dowolnosć hižo wot lěta 2013 nima.
To a tamne (19.01.17)
Pedalej płuna a borzdźidła zaměnił je šofer w myjerni awtow porynsko-pfalcskeho Bad Dürkheima. Kaž w policajskej rozprawje rěka, smaleše 65lětny z awtom po myjerni, při čimž sobudźěłaćerja snadnje zrani. Awto zjědźe přez dróhu hač na parkowanišćo kupnicy. Tam zrazy do parkowaceju jězdźidłow a wosta skónčnje stejo. Cyłkownu škodu trochuja na 70 000 eurow.
Z druheho poschoda wjaceswójbneho domu skočił je muž w Podstupimje, zo by so zajeću wuwinył. Do toho bě chětro wopity nan policistow při durjach wotpokazał, kotřiž za jeho 31lětnym synom z wukazom zajeća pytachu. Tón so na to w kupjeli schowa. Po tym zo běchu nana přewinyli, zastojnicy hrožachu, zo durje kupjele namócnje wotewru. Muž pak z woknom skoči a ćekny. Policisća zajachu jeho krótko na to w pincy.
To a tamne (18.01.17)
K mjezynarodnemu dnjej joggingowych cholowow chce jedna z Mnichowskich kupnicow wšěm sekt wudać, kotřiž jutře w treningowych cholowach nakupować přińdu. Wabjenska akcija zbudźa wulki wothłós: Wjace hač 2 000 ludźi je připrajiło, zo přińdźe; 8 000 je w interneće swój zajim signalizowało. Poprawny dźeń joggingowych cholowow je sobotu. Kupnica pak chce tołkańcy zadźěwać, dokelž tam sobotu swójby nakupuja.
Konja z wodoweho basenka wuswobodźiła je wohnjowa wobora w Choćebuzu. Kóń bě wčera z pastwy w Depsku ćeknył a do poola skočił. 19 kameradow pool wuklumpa a namjeta do njeho słomjane walčki, po kotrychž móžeše skoćo skónčnje basenk zaso wopušćić. Wšón čas su wohnjowi wobornicy chribjet konja z ćopłej wodu wohrěwali. Wšako traješe akcija něhdźe tři hodźiny.
To a tamne (17.01.17)
Z hrajkanskej pistolu je 17lětny spytał pózdni wobchod w Berlinje-Friedrichs-hainje nadpadnyć – a bu zajaty. Młodostny bě wčera wječor do wobchoda zastupił a z pistolu, kotraž wupadaše kaž prawa bróń, předawarku a štyrjoch kupcow wohrozył. Jako wustróžana sobudźěłaćerka kasu spěšnje dosć njewočini, chcyše so rubježnik zaso zminyć. To jeho kupcaj hrabnyštaj a zadźeržeštaj, doniž policija njepřijědźe a „nadpadnika“ njezaja.
Třo natutkani policisća su w belgiskej stolicy Brüsselu zasadźenje kolegow zawinili. Zastojnicy sedźachu w kofejowni a pijachu alkohol, w uniformje a wobrónjeni. Policajske awto běchu w bliskosći wotstajili. Wopytowarjo pak mějachu zadźerženje wjesołeje trójki za spodźiwne a wołachu policiju. Jako kolegojo přijědźechu, spyta jedyn z třoch ćeknyć. Jim hrozy nětko disciplinarne jednanje.
To a tamne (16.01.17)
Problem zymumrěća chcedźa w Stuttgarće na cyle njeběrokratiske wašnje rozrisać. W zymje dźě trjebaja ludźo ćopłu drastu. A dokelž mnozy tajku nimaja, steji nětko na dróze, hdźež je wjele žiwjenja, drastowe wěšadło, z kotrehož móža so potrěbni posłužować. „Je-li ći zyma, sej něšto ćopłe wzmi! Chceš-li pomhać, wostaj něšto tu!“ steji na připrawjenej tafličce. Po wšěm zdaću tale namołwa skutkuje. Znajmjeńša wisachu tam dźensa wjacore ćopłe kabaty, a zymu mrějacy so rady posłužowachu.
Slědy w sněze su šofera w Pirmasensu přeradźili, kiž bě wopity njezbožo zawinił. Pasant wuhlada sobotu rano chětro wobškodźene awto, kotrež bě do před nim stejaceho jězdźidła zrazyło. Slědy w sněze wjedźechu wottam ke chěži, hdźež nańdźe policija 32lětneho natutkaneho, kiž hišće chětro za alkoholom „wonješe“.
To a tamne (13.01.17)
Jackpot při parkowanskim awtomaće dobył je 48lětny muž w bayerskim Memmingenje. Jako chcyše muž z pjećeurowskej bankowku parkowanski lisćik zapłaćić, wróći jemu defektny awtomat hromadu drobnych pjenjez – dokładnje 201,50 eurow. Sprawny muž wšak woteda pjenjezy na policajskej straži. Awtomat pak je mjeztym zwuporjedźany.
Móšeń z lódzymneje rěki wućahnył je wuchowanski płuwar w Hornjej Pfalcy a je tak žonje z wuskosćow pomhał. 30lětnej bě móšeń z pjenjezami, wupokazom a pjenježnej kartu w Ambergu do rěki Vils padnyła. Jeje synk bě do toho spytał swoju čapku do rěki ćisnyć. Mać drje móžeše tomu zadźěwać, při tym pak jeje móšeń do wody padny. Žona zawoła policija a ta towaršnosć za wuchowanje žiwjenja. Płuwar zalěze do rěki a móžeše 30lětnej móšeń skónčnje přepodać.
