FSV Budissa Budyšin
– Berlinski AK 1:3 (0:1)
Zestawa Budissy: Große – Kolan, Fröhlich, Patka, Heppner, Hoßmang, Kral, Walther, Salewski, (69. Kunert), Reher, Hansch (79. Čermák)
Posledni hrajny dźeń w regionalnej koparskej lize měješe wo čole tabulki rozsudźić. Berlinski AK a FSV Zwickau měještej samsnu ličbu dypkow a nimale samsny wrotowy poměr. Zwickau z jednymi wrotami wjac na konće hraješe w Schönbergu a Berlinski AK w Budyšinje. Za tudyšich 750 přihladowarjow běše to wězo napjata wěc. Při sćoplenju zrani so Christoph Klippel, a za njeho hraješe Max Fröhlich. Do hry rozžohnowachu zamołwići Budissy mustwoweho nawodu Wolfganga Seilera, kiž bě zastojnstwo 32 lět z krótkim přetorhnjenjom, jako běše pola Jednoty Kamjenc, wukonjał.
Koparjo Budissy Budyšin započachu koncentrowanje a mějachu tež hnydom móžnosći přez Rehera (4.) a Walthera (17.). Dale a lěpje pak namakachu so hosćo do hry, a wrotar Marek Große dyrbješe dwójce zapřimnyć (18., 24.). Do přestawki padnychu hišće zasłužene wrota za AK Berlin přez Kahlerta (36.).
