Za dwaj tydźenjej, 17. junija, měła so 57 ludźi wopřijaca serbska delegacija z Njebjelčic do Južneho Tirola na euro­peadu podać. Kaž pak zamołwići zdźělichu, nastaji so tón dźeń mjenje ludźi na puć.

Njebjelčicy (SN/JaW). Znajmjeńša dźesać koparjow, wosom hrajerjow Sokoła Ralbicy/Hórki a dwaj Sportoweje jednotki Chrósćicy, po­jědźe hakle dźeń pozdźišo na turněr. Přičina je finale wokrjesneho pokala sobotu, 18. junija, we Wulkej Dubrawje, hdźež stejitej sej serbskej mustwje napřećo. Hru wšak móhli přestorčić, měni trenar wubranki muži Frank Ričel, skedźbnjacy na tajki pad w krajnej lize. Po słowach mustwoweho nawody wubranki muži Bjarnata Deleńka pak zaležeše to na pobrachowacej woli. Ta falowaše po wšěm zdaću předewšěm wjednistwu Chróšćanskeje SJ.