Sand in Taufers (SN/JaW). Dobyćerja 3. koparskich mišterstwow narodnych mjeńšin Europy w Južnym Tirolu wuhraja bjez wobdźělenja Serbskeje koparskeje wubranki. Wona njezamó wčera dwubój z Korutanskimi Słowjencami za sebje rozsudźić a je z poražku 3:2 štwórćfinale misnyła. „Smy sej wjac předewzali, ale to je kopańca. Wězo so mjerzam, wšako mějachmy šansu dale­ přińć“, wobžarowaše kapitan Pětr Domaška. Kaž nawodnistwo turněra informowaše, nastupja serbscy koparjo zajutřišim, pjatk, w hrě wo 13. městno přećiwo Sewjernym Frizam w Ahrntalu. Serbske koparki hraja hižo jutře w Mühlwaldźe wo 5. městno.

Serbska koparska wubranka pak wčera přiwšěm pokaza, zo je dobry přěhračk. Koparske towarstwo Ahrntal přeprosy po hrě na zabawny wječor. Mjez hosćimi běchu tam nimo serbskeho tež mustwo Němcow z Danskeje a mnozy serbscy přiwisnicy. W duchu europeady pěstowachu wšitcy lóštnu zhromadnosć. Wo dobru naladu staraštaj so live-skupina a akordeonist­ Florian Bejmak, kiž skupinu sčasami zesylni. Tak zaklinčachu k zabawje tež serbske štučki.