W Ramnowje, ródnej wsy wuznamneho němskeho filozofa Johanna Gottlieba Fichty (1762–1814), wotmě so mjez tym 5. Fichtowy běh, na kotrymž je 305 lubowarjow běhanja a 15 atletow we walkingu startowało. To běše nowy wobdźělniski rekord. We woběmaj disciplinomaj běchu tež zaso serbscy starterojo jara wuspěšni. Jednotliwe distancy běchu 0,8 km, 2,2 km a 7,5 km.

Na 2,2 km za staršich šulerjow wubědźi sej serbska gymnaziastka Larissa Měrćinkec z Chelna dobyće w spěšnych 8:57 min. Wjetšina aktiwnych měrješe swoju wutrajnosć a spěšnosć na najdlěšej distancy 7,5 km. Aktiwni běchu z cyłeje Hornjeje Łužicy a wulkeho Drježdźanskeho wobwoda. Cyłkownaj dobyćerjej rěkaštaj Steffen Vogel (27:12 min.) a Sandy Pollack (30:45 min.). Najwuspěšniši serbski starter na tejle dołhej čarje běše Jakub Čórlich z Němcow. W spěšnych 27:21 min. doběža wón jako cyłkownje druhi do cila, w swojej skupinje 20 do 29 lět pak jeho prěni. W samsnej sk wobsadźi Richard Paška 5. městno (31:59 min.) a cyłkownje 39. Druhi najstarši w Ramnowje startowacy, spisar tutych linkow, bě třeći w sk 80 do 84 lět (58:08 min.).

Na 7,5 km wubědźowachu so tež pjatnaćo we walkingu.