Lille. Wot soboty smy w finalnej fazy europskich koparskich mišterstwow 2016 w Francoskej. Šěsnaće cyłkow wuhrawa­ hač do dźensnišeho wo­smi­finale. Šěsć duelow smy hižo dožiwili, dwaj stej hišće dźensa wječor w šesćich (Španiska – Italska) a w dźewjećich (Islandska – Jendźelska). Z jasnym dobyćom 3:0 je so němska wubranka wčera přećiwo Słowakskej přesadźiła. Přećiwnik njebě w žanej fazy hry kontrahent a nimale přez cyły čas přežadany. Hižo zahe trjechi Jerome Boateng 1:0, Mario Gomez docpě druhe wrota a wčera chětro sylny Julian Draxler třěli 3:0.

Sobotu wječor w Bordeauxje pak budźe nadawk wo wjele ćeši. Tam wočakuje chowancow trenarja Joachima Löwa pak Španiska pak Italska. Přećiwo Španiskej je Němska 2008 finale europskich mišterstwow přěhrała a lěće pozdźišo połfinale swětowych mišterstwow. Tež Italsku njeje w zašłych wosom turněrowych hrach přewinyć móhła.