Marseille. Němski sudniski kolektiw wokoło dr. Felixa Brycha nawjedowaše wčera prěnje štwórćfinale europskich koparskich mišterstwow w Francoskej, a to mjez Portugalskej a Pólskej. Po 120 sekundach zrumowa superstar FC Bayerna Mnichow Robert Lewandowski wšitke dwěle, kotrež po­ćahowachu so w zašłymaj tydźenjomaj na jeho formu. Kamil Grosicki bě so derje na prawym boku přesadźił a jemu bul do centruma šěsnatki sflankował. Nadběhowar steješe tam, hdźež dyrbi stać, a přetwori k 1:0. Poł hodźiny pozdźišo trjechi dalši star FCB. 18lětny nowopřichad Renato­ Sanches wuruna po dwójnym pasu­ z Nanijom z krasnymi wrotami. Druhi połčas běše bohužel wostu­dły, znajmjeńša z mojeho wida. Wobaj cyłkaj sej zaćah do koła najlěpšich štyrjoch poprawom zasłužiłoj njejstej. W podlěšenskim času měješe jenož hišće portu­galski superstar Cristiano Ronaldo naspomnjenjahódnu šansu. Štyri mjeńšiny do kónca móhł wón wšitko rozsudźić. Po perfektnej­ přihrawce João Moutinha steješe­ sam před wuběrnym wrotarjom Łuka­szom Fabiańskim, kiž dźeržeše.