Loni nastupichu Ralbičanscy koparjo – stari knježa prěni raz we wokrjesnym pokalu. Hnydom w prěnjej hrě přećiwo Natwarej Wojerecy 1919 so jich prašachu, čehodla we wólnočasnej lize wo dypki sobu njehraja. Maja dźě dosć dobru kwalitu, a mustwa bychu so wjeselili, bychu-li přećiwnika wjace měli.

Tak so mužojo započatk lěta za winowatostne hry rozsudźichu. Hnydom pak wujewi so problem. Jako hrajny plan wuńdźe, běše jasne, zo njehodźa so wjace wšitke w lěće 2015 wujednane přećelske partije přewjesć. Tež hra přećiwo starym knjezam ST Marijineje hwězdy bě potrjechena. Ralbičenjo startowachu z dwěmaj remisomaj do sezony. Přećiwo Módro-běłym Kulow běše njerozsudne 0:0 wězo mały wjeršk. W dalšich hrach pak hižo tak derje njeběžeše. Ralbičenjo worachu přewjele zmylkow, kotrež so hnydom chłostachu. Tak slědowachu štyri poražki. Hač na jednu wysoku (0:5 přećiwo Natwarej Wojerecy 1919) přěhrachu Sokoljo hry stajnje z jednymi wrotami rozdźěla. Na tym měješe so wězo dźěłać.