Lyon. Zawěsće ličachu waliziscy fanojo wčera hižo při wotskoku Cristiana Ronalda k hłójčkowanju, zo budźe jich koparska bajka snano w přichodnym wokomiku zakónčena. A to wona potom tež woprawdźe běše. Portugalski superstar šrubowaše so kaž helikopter do powětra a zhłójčkowa bul krasnje do wrotow. Jako Nani tež hišće 2:0 trjechi, njenamaka mustwo wokoło waliziskeho superstara Garetha Balea žanu wotmołwu. Na wobojich wrotach běše Ronaldo jako třělc a přihotowar wobdźěleny. Při 1:0 (50.) stłóči nadběhowar Reala Madrid flanku Raphaëla Guerreira do wrotow a tři minuty pozdźišo třěli Ronaldo cyle jednorje na wrota. Nani tykny nohu do třělwy a hižo ležeše bul w saku. Waliziscy přiwisnicy pak dale spěwachu a kleskachu, wopokazujo so jako fairni přěhračcy. „Naši fanojo su najlěpši swěta, z wulkim wotstawkom“, rjekny Bale, kotrehož jeho klubowy kolega Ronaldo po hrě tróštowaše­.