Ćelčki a dalše insekty wobdźělnikow tónkróć njemjerzali

Přijomne za konjacych sportowcow a wosebje za konje w Hórkach bě, zo so ćelčki­ a dalše insekty lětsa před dešćom a njepřijomnymi temperaturami chowachu. Turněr běchu zamołwići konjaceho sportoweho towarstwa Při Klóšterskej wodźe Pančicy-Kukow dla nich mjenujcy ekstra na september połožili. Naprawa bě tuž wuspěšna. Škoda pak bě, zo njemóžachu někotři sportowcy – tež do­moródni – w Hórkach startować. Sezona so mjenujcy nachila a tójšto koni je po wjacorych wubědźowanjach zranjenych, na přikład Prawočanski Brězanec Major Tom, Bobkec konjej z Miłoćic a Zahro­d­nikec kobła Namibia, kotraž je hižo wosom tydźenjow bjez wubědźowanja. Chróšćan Křesćan Zahrodnik pak měješe w Hórkach pjatk, sobotu a njedźelu­ z pjećlětnym Last Lehnbachom a ze šěsćlětnym Mighty Maxom dalšej konjej při starće. „Last Lehnbach bě dwójce třeći, to mje absolutnje spokoja. Mighty Max je prěni raz na mjezynarodnej runinje startował a měješe tu w Hórkach cyle solidne wuslědki“, Zahrodnik wčera popołdnju rjekny.