ST Zeleno-Běli Sepicy

– ST Marijina hwězda 2:2 (0:0)

Zestawa hosći: O. Schmidt – Wróbl, Rab, Jurš, Lipič, Njek, Bělk, Hawš, P. Schmidt, Čornak (46. Pěčka), Winkler (88. Matik)

Do wonkowneje hry w Sepicach knježeše w rjadach koparjow Marijineje hwězdy prekerna personalna situacija. Trenar Tobias Škoda dyrbješe so dźesać akterow wzdać a sej z hrajerjemi druheho mustwa wupomhać. Ći swoju wěc prima zmištrowachu. Prěnju móžnosć za hosći měješe Marko Njek. Hłójčkowany bul pak wrota misny. Po tym nadźěłachu sej tež hosćićeljo někotre šansy. Při třělwje Marka Abdina pak běše wrotar Oliver Schmidt na městnje a zběhnjeny bul dźěše snadnje nimo žerdźe (17.). Najwjetšu składnosć k nawjedowanju wuwostaji Oskar Hawš wosom mjeńšin do přestawki. Ze zdalenosće pjeć metrow prasny wón bul do nohi přećiwnika, kotryž steješe na wrotowej liniji. Njeleposć sta so krótko do přestawki Maćijej Wróblej. W šěsnatce Sepičanow bě Wotrowčan přećiwnika foulował a za to swoju druhu žołtu kartu dóstał.