Jěchanski turněr w Jěžowje

Na Grofic jěchanskim dworje w Jěžowje maja wot dźensa do njedźele jěchanski a skakanski turněr za nowačkow a wólnočasnych jěcharjow. Jutře steji wot 8 hodź. do 18 hodź. dresura w srjedźišću, njedźelu změja za skakanje sydom wšelakich parcoursow spřihotowane.

Volleyball w Ralbicach

Worklečanske volleyballistki a volleyballisća su jutře, sobotu, cyły dźeń w Ralbičanskej ćěłozwučowarni. Wot 10 hodź. hraja Worklečanki we wobwodnej klasy přećiwo holcam VV Žitawy 09 III a volleyballistam z Hamora/Běłeje Wody. Wot 14 hodź. su Ralbičansku sportowu halu Worklečanscy volleyballisća knihowali. Načolnik wobwodneje ligi wočakuje OSC Lubij a VfB Zhorjelc.

Sakska přećiwo Pruskej

Wutoru, 15. nowembra, wuhrajetej Pěskečanska a Sulšečanska młodźina koparski duel „Sakska přećiwo Pruskej“. Hrać budźe so w Pěskecach, a to wot 18.30 hodź. pod swětłomjetakami.

Počuchać a šach hrać

We wobłuku KOMM-PROJEKTA zarjaduje Sportowy zwjazk Budyšin 22. oktobra w Budyšinje w Kamjentnym domje wot 9 do 12 hodź. móžnosć, so w sportowej družinje šach wuspytać.