SJ Njebjelčicy

– SZ Drjewnica 2:0 (1:0)

Zestawa domjacych: Hahn – Zeller, Hommel, Pawlik, Šołta, Hanuza, Haška, Cyž, Hrjehor (69. Hoelzel), Lejnart (90. Šram), Čornak (60. Korjeńk)

Kermušnu njedźelu njebě to runjewon najlěpša hra koparjow Njebjelčanskeje SJ, byrnjež dobyli. Nerwozita a njedosahaca koncentracija knježeštej přez dołhi čas prěnjeje połojcy. Nadběhi přez Pawla Hrjehorja a Jurja Hašku so konsekwentnje dosć njewotzamknychu. Tommy Hommel zhłójčkowa po róžku wyše łaty a Gabriel Čornak misny po kombinaciji Robert Lejnart–Tadej Cyž bul před klětku hosći. Tež Cyžowy wólny kop dźěše přez wrota. W tym času bychu hosćo z trochu zbožom z jednymi abo dwojimi wrotami přez spěšne kontery nawjedować móhli. Faktisce z wothwizdanjom prěnjeho połčasa poradźi so Ronnyjej Hanuzy z hłójčku 1:0.