Wulke přesłapjenje su fanojo FC Energije (FCE) Choćebuz minjene dny předźěłać dyrbjeli. Po tym zo bě hruby hrajny plan za regionalnu ligu kruty, je Sewjeroněmski koparski zwjazk (NOFV) eksaktne hrajne terminy postajił.

A z terminow NOFV nětko wučitaš, zo hraje FCE na 19. hrajnym dnju štwórtk, 2. februara, w 13.30 hodź. w Lipsku přećiwo RB Lipsk II. Chětro wulki bě wukřik mjez fanami Energije, kotřiž běchu hižo w prěnjej połseriji při wažnej wonkownej hrě přećiwo Carl Zeiss Jenje „wuzamknjeni“. Tež tule partiju běchu štwórtk přewjedli. Bjez dźiwa, zo so Choćebuski přiwisk hórši: „Najwjetši dźěl chodźi na dźěło. Ći, kiž w změnach dźěłaja, bjeru sej přeco dźeń dowola za wonkowne hry, ale to w NOFV po zdaću nikoho njezajimuje. Do Lipska by zawěsće 1 000 ludźi jěło, nětko pak dyrbi so naše mustwo ze 100 rentnarjemi spokojić“, rěka zhromadne měnjenje w fanowej scenje. NOFV pak wopodstatni postajenje z wobmyslenjemi wokoło wěstoty. We a wokoło Lipska je prěni februarski kónc tydźenja chětro wjele zarjadowanjow. Policija njemóže tuž mjenowanu koparsku hru pjatk abo sobotu zawěsćić.