Hnydom prěnju sobotu lěta dyrbjachu młode volleyballistki ST Marijineje hwězdy III, kotrež trenuje Anne Šołćic, we Wojerecach nastupić. Wjele chwile, mjez hodami a Nowym lětom zwučować, wšak wone njemějachu.
SC Wojerecy – ST Marijina hwězda III 0:2 (16:25, 5:25)
Wot wšeho spočatka holcy z Pančic dominowachu. Wone pokazachu, zo po kóždym treningu sebjewědomišo postupuja. Wojerowčanki njemějachu scyła žanu prawu móžnosć, sobu dźeržeć. Dobre nadaća Nele Pjetašec a Heleny Hejduškec zaručichu hwězdźičkam dobyće druheje sadźby z 20 dypkami předskoka.
Z wulkej motiwaciju podachu so wone tuž do dalšeje partije dnja. Přećiwnik steji tučasnje na druhim městnje tabulki.
Módro-běłe Wojerecy II
– ST Marijina hwězda III 2:1
(17:25, 25:21, 15:11)
Z dobrymi akcijemi a połne elana dobychu hwězdźički prěnju sadźbu, štož bě mała sensacija. We hłowach holcow tčeše nětko hižo dobyće. Po słowach trenarki Anny Šołćic běchu sej wone přewěste, zo tež přichodnu sadźbu dobudu. To wjedźeše k zmylkam, z wuslědkom pak móža přiwšěm spokojom być. Postupy w chětro młodym mustwje su widźomne.
