Při chětro wětřikojtym zymnym wjedrje je so minjenu srjedu hižo 30. jubilejny běh wo hórskeju kralow wot Hornjohórčanskeje sportoweje hale hač na wjeršk 449 metrow wysokeje hory Mnišonc přewjedł. Při tymle wubědźowanju ze zdźěla jara nahłymi stupanjemi mějachu mužojo kaž žony wšitkich starobnych skupin, tež ći najstarši, 230 metrow wysokostneho rozdźěla přewinyć. Cil běše za nich direktnje při woblubowanym hosćencu z wuhladnej wěžu, ke kotremuž je so 62 atletow a 15 atletkow zdračowało.

Mjez mužemi je sej 31lětny Hartmut Engert z Budyšina titul hórskeho krala w 14:36 min zawěsćił. Pola žonow bě 32lětna Franziska Kranich z Niskeje hórska kralowna w 17:17 min. Na 3,3 kilometrach wubědźowaštaj so tež zaso najstaršej wobdźělnikaj cyłeho zarjadowanja: 70lětna Hella Helmowa z Rakec (37:32 min) a 82lětny Jurij Nuk z Budyšina (33:10 min), kotrajž so tohorunja hač na wjeršk dodrapaštaj. Wobeju počesći Hornjohórčanske sportowe towarstwo w starobnymaj klasomaj.