TSV Połčnica 1920 – Sokoł Ralbicy/Hórki 0:1 (0:0)
Za Ralbicy zasadźeni: Žur – Heidorn, An. Wałda, Rachela (62. Hrjehor, 90. +2 Materna), Schultz, Bejmak, Šołta, Woko (74. Matka), Rawš, Gloxyn, S. Bjeńš
Po třoch poražkach pospochi nastupichu Sokoljo pola sylneho postupnika z Połčnicy. Domjacy běchu sej z jara dobrymi wukonami 39 dypkow nazběrali a steja na solidnym dźesatym městnje, štož woznamjenja, zo tež klětu we wokrjesnej wyšej lize hraja.
Stary trawnik bu w Jahnowym stadionje před dwěmaj lětomaj na rjany kumštny trawnik wuměnjeny. Na to dyrbjachu so Ralbičenjo nastajić. Prěnja šansa słušeše domjacym, jako po šmjatańcy w šěsnatce wotzamknyć móžachu. Po běrtlk hodźinje misny Křesćan Bejmak po wólnym kopje snadnje bul. Hra běše wurunana a wotmě so mjez šěsnatkomaj. Šansy pak so hdys a hdys tola wuhrachu. Po poł hodźinje zamó wrotar Titus Žur hłójčkowany bul runje tak z porstami na žerdź stłóčić. Jenož tři mjeńšiny pozdźišo so znowa wuznamjeni, jako mócnu třělwu z 22 metrow k róžkej wotwobara. Sokoljo běchu po róžku strašni. Škitar Andy Schultz pak njezamó bulej prawy ćišć dać a tak zleća kulowata koža wyše wrotow (40.).
