Serbske mustwo –
Němcy z Hornjeje Šleskeje
1:3 (0:0)
Na rozsudnym třećim hrajnym dnju w skupinje B lětušeje Europeady podachu so serbscy koparjo znowa do Sewjerneje Friziskeje do městačka Bredstedt, hdźež hrajachu přećiwo FC DFK Hornja Šleska. Dopołdnja bě so team wokoło trenarjow Franka Ričela a Svena Ballacka k treningej zhromadźił, zo by mjez druhim tež poslednje taktiske nastajenja za hru přećiwo najćešemu přećiwnikej skupinskeje fazy zwučował.
Popołdnju w Bredstedće wjace hač 400 serbskich fanow mustwo wjesele powita. Woni postarachu so wo absolutnje jónkrótnu atmosferu a podpěrachu swoju jědnatku hač do poslednjeje minuty jara wótře. Z Janšojc bě ekstra cyły bus połny fanow přijěł. A tež serbske žónske mustwo muži energisce podpěraše.
Porno hrě dźeń do toho namakachmy na wosom pozicijach čerstwe mjezwoča. Tak hraješe Lucas Lehmann w nadběhu a tež zestawa w škiće bu přez trenarski zapřah přećiwnikej přiměrjena.
