Zhromadnje ze swojimi fanami startowachu Łužiske lodohokejowe liški z wulkej zahajenskej partyju do přichodneje hrajneje doby. Při rjanym słónčnym wjedrje bě něhdźe 400 fanow přeprošenju sćěhowało a přebywaše na arealu před lodowej arenu.

Dypkownje připołdnju w 13 hodź. powita jednaćel Dirk Rohrbach přitomnych fanow a hosći. Zabawnje informowaše wo wukonjanych dźěłach po zakónčenju sezony. Dale rozprawješe wo jednanjach z dotalnymi a nowymi hrajerjemi, wo etaće a wo rekordnych trajnych lisćikach, kiž wučinja 1 175 městnow. Tež planowanja nastupajo mjezynarodnu kubłansku a sportowu akademiju běchu dalši dźěl jeho wuwjedźenjow.