Denny Kral, hrajer regionalneho ligista Budissy Budyšin a Serbskeje koparskeje wubranki muži, je sej njedawno licowu kósć złamał. W času, zo dyrbješe rodźeny Njebjelčan z treningom a hrami wusadźić, je so z nim Tadej Cyž-Njebjelčanski zetkał a rozmołwjał.
Po dwěmaj lětomaj w Neugersdorfje a Meuselwitzu nosyš zaso trikot Budissy. Kajke běchu tu prěnje hry?
D. Kral: Je to puć wróćo ke korjenjam. Přez lěćo sym so w Lipsku fit dźeržał. Započatk tu w Budyšinje bě za mnje jara intensiwny, štož pak je normalne. Trochu falowaše mi hrajny rytmus. Nětko pak jón mam a sym spokojom.
Sy z Budissu zrěčenje podpisał a so hnydom ze stajnym hrajerjom stał. Bě to překwapjenka?
D. Kral: Tróšku haj. Trenarjo pak su mi hnydom dowěrjeli, a ja so tu derje čuju.
W pokalnej hrě přećiwo VFC Plauenej sy so w podlěšenju zranił. Što bě so stało?