Srjeda do Božeho spěća je w běharskich protykach hižo lěta dołho kruty termin. Přetož potom jědźe zaso wšitko – nic přisłownje, ale posłownje – Krakecam. Tudyše towarstwo MSV Módro-běli powita mjeztym 30. raz sportowcow zbliska a zdaloka­ na swój tradicionalny běh a mjez nimi tež zaso horstku Serbow. Wjace hač 430 młodych a staršich wobdźělnikow wubědźowaše so při najpřijomnišim wjedrje na čarach mjez 350 m a 10,2 km, a dźěći su kaž přeco wubědźowanje zahajili. Na 700meterskim kole po wsy pokaza Jarek Schade z Budyskeje Serbskeje zakładneje šule sylny wukon a njedoby jenož w swojej starobnej klasy sk 8, ale bu samo cyłkownje druhi w zhromadnym běhu ze staršimi dźěćimi sk 10. Tež jeho sotra Jitka (sk 10) a Annelie Kummerec (sk 8) z pěstowarnje „Jan Radyserb­-Wjela“ móžeštej ze sedmym městnom w swojimaj starobnymaj klasomaj spokojom być. Starši šulerjo startowachu na čarje 2,1 km. Najwuspěšniši mjez hólcami sk 14 bě Dawid Žur za tri-team-serbja a wubědźi sej bronzowy podest w 8:17 min. Tež Elias Kummer (OSLV Budyšin) ze Serbskeho gymnazija bě jako šesty w sk 12 prědku pódla.