Drježdźany (SN/MiR). Sakske ministerstwo za kulturu a turizm (SMWK) spožči lětuše Myto Zejlerja za serbsku rěč Jěwje-Mari Čornakec. We wobkrućenju jury rěka: „Jěwa-Marja Čornakec dóstanje Myto za serbsku rěč Myto Zejlerja 2024 za wusahowace zasłužby na polu serbskeje literatury.“ Statna ministerka Barbara Klepsch je poručenje jury přiwzała a rjekny: „Gratuluju nowej lawreatce wutrobnje a wjeselu so, zo so z tymle mytom jeje wobšěrny angažement oficielnje hódnoći. Z jeje skutkowanjom je Jěwa-Marja Čornakec přikładnje dopokazała, kak hodźi so posrědkowanje a wužiwanje serbskeje rěče z kreatiwitu, angažementom a zaměrnosću dale wuwiwać.“ Na naprašowanje SN praji lawreatka: „Sym přewšo překwapjena. Myto mje jara česći a sym jara zwjeselena. Je to wulke připóznaće mojeho dźěła.“