SJ Chrósćicy –

LSV Hory 0:5 (0:2)

Zestawa domjacych: Škoda – Sćapan, M. Donat, Kola, Čornak, Zynda, Wowčer, Liznar, B. Donat, J. Donat, Zahrodnik (46. Mark)

Wot spočatka sem pokazachu hosćo, zo chcychu hru dobyć. Tak hižo po třoch mjeńšinach we wrotach Jakuba Škody klinkaše. Při zamjeće Chróšćanow zdoby sej kapitan hosći w srjedźnym polu bul a přihra jón přez hasku mjez nutřkownym a wonkownym škitarjom domjacych nadběhowarjej, kotryž hrajny nastroj do wrotow suny. Krótko na to mějachu domjacy zbožo, zo kožana kula znowa puć do wrotow njenamaka, ale zo nadběhowar z pjeć metrow jenož Chróšćanskeho škitarja trjechi. Poněčim pak so Chróšćenjo do hry namakachu, při čimž hosćom hłownje bul přewostajichu a přez spěšne kontery Bosćana Donata na lěwej stronje sej šansy wuhrachu. To so jim wjacore razy poradźi, tola wotzamknjenja wrota misnychu abo kedźbliwy wrotar je wotwobara. Po 36 min. dóstachu hosćo wólny kop přizwoleny. Tutón třělc do šěsnatki flankowa, hdźež nutřkowny škitar Horjanow hrajny nastroj wótrje do saka zhłójčkowa. Tak rozžohnowachu so mustwje z 0:2 do połčasa.