ST Łužnica – Viktoria Worklecy 3:1 (25:15, 17:25, 25:22, 28:26)
Jenož tydźeń po hórkej poražce w Pirnje dyrbjachu Worklečanscy wolejbulisća k přichodnemu wonkownemu přećiwnikej ST Łužnicy pućować. Předznamjenja stejachu hišće hubjeńšo hač w předchadźacym tydźenju, dokelž njebě chorosće a zranjenja dla pozicija srjedźneho blokowarja wobsadźena. Sćěpan Wjeńka so woprowaše, na tutej njezwučenej poziciji hrać. Přez to pak bě nadběhej Viktorianorow jich najsylniša bróń wzata a tak wupadaše tež prěnja sadźba. Jenož mało nadběhow hosći běše wuspěšne. Pobrachowaštej preciznosć a ćišć. K tomu přidružichu so njewěste přiwzaća a nadaća. Domjacy móžachu tak prěnju sadźbu bjez prócy 25:15 za sebje rozsudźić.
