Liza-Marija Cyžec je lětsa abituru złožiła a so potom za najlěpšu opciju rozsudźiła: něšto měsacow w redakciji Serbskich Nowin­ dźěłać. Tak móže so 19lětna Chróšćanka wšědny dźeń z nowymi temami serbskeho a druheho swěta zeznajomić. Wona njeje sej pak mysliła, zo budźe jej dźěło za redakciju serbskeho dźenika tak spodobać. Wšako druhdy hakle na rańšim posedźenju zhoniš, štož změješ popołdnju na starosći.

Přiwšěm profituje redakcija wot jeje kruteho zakótwjenja w serbskim kulturnym žiwjenju a wjele kontaktow. A Liza-Marija dóstawa nic jenož dohlad do pisanja, komentowanja, ale, kaž sama praji, „móžnosć zwučować, kritisce swoje měnjenje prajić.“

Team redakcije začuwa wona jako jara pomocliwy, tak dóstawa přeco hnydom wotmołwu na wšě prašenja. Zdobom so redaktorojo wězo wjesela, zo něhdyša šulerka wukonoweho kursa serbšćiny w dobrej maćeršćinje tež pod wulkim časowym ćišćom jara produktiwnje – z tekstami a fotami – k aktualnym wudaćam Serbskich Nowin přinošuje.