Awtor dźensa

Tomaš Faska

Před něšto dnjemi mějach składnosć, wobhladać sej na wobrazowce napjate wubědźowanja w sportowej družinje, za kotruž so dotal w swojim žiwjenju njejsym wosebje zajimował. Rěč je wo tenisu. W Chicagu, třećim najwjetšim měsće USA, bě tak mjenowany „Laver-cup“. Dotal mało znate mustwowe wu­bědźowanje wotmě so hakle druhi raz. W nim nastupi Europa přećiwo „zbytkej swěta“. Najlěpši hrajerjo našeho konti­nenta hrajachu potajkim přećiwo swětowej wubrance Njeeuropjanow. Na jednym boku běchu to naš Alexander Zwerew, Šwicar Roger Federer a dalši pjećo ze wšelakich europskich krajow, na tamnej stronje Awstral­čan Kyrgios, Južnoafričan Anderson z tohorunja pjeć dalšimi kolegami.

Mjenodawar wosebiteho turněra je wu­znamna tenisowa legenda Rod Laver. Mjeztym 80lětny Awstralčan je sej w 23 lětach swojeje karjery jako tenisowy hrajer nic mjenje hač 200 mjezynarodnych titulow wubědźił a bu tež tohodla 1981 do wuznamneje „Hall of Fame“ tenisoweho sporta přiwzaty.