Awtor dźensa

Jan Hrjehor

Handrikec kwartet Lena, Marta, Syman a Klemens z Dobrošic, Pascal Budar ze Šunowa, Denny Gloxyn z Ralbic a k tomu tež hišće něhdyši Wudworčan Tomaš Rauthe, wšitcy horja so za zwjazkoweho koparskeho ligista Werder Bremen. Wot zašłeje soboty móžu z runje mjenowanej sedmičku tež kusk sobu rěčeć a jich zahoritosć za najsewjernišeho zwjazkoweho ligista rozumić a sćěhować. Za winowatostnu dypkowu hru Werder Bremen – FC Bayern München na 31. hrajnym dnju dóstach mjenujcy zastupny lisćik poskićeny. A dokelž bě moja terminowa protyčka zawčerawšim sobotu hišće běła, poskitk za wječornu hru na poł sedmich w Bremenje rady přiwzach.