Woblubowana dujerska kapała Horjany swjeći lětsa 30. róčnicu swojeho załoženja. Bosćan Nawka je so ze Sonju Hejdušcynej, managerku cyłka, wo planowanym narodninskim swjedźenju rozmołwjał.
Knjeni Hejdušcyna, kak chceće jubilej woswjećić?
S. Hejdušcyna: So wě z hudźbu! Wuhotujemy přichodnu sobotu, potajkim 20. apryla, koncert w Chróšćanskej wjacezaměrowej hali „Jednota“. Něhdźe dwuhodźinski, žortnje moderěrowany program wopřijima wšitke muzikaliske wjerški minjenych třoch lětdźesatkow z našeho repertoira. Tak zaklinča znate polki runje tak kaž serbske a němske ludowe pěsnje za sobuspěwanje, šlagry a serbski rap. Nimo toho předstajimy prapremjeru: We wobłuku wubědźowanja za žiwu dwurěčnosć Simul+ smy loni mjeztym online přistupne hudźbne widejo za medley „Hindraško“ produkowali, zestajany ze spěwow Bjarnata Krawca „Hindraško, ty synko mój“ a „Šěrik, měrik, bałdrijan“. Wosebitosć medleyja je, zo wuwije so z originalneju melodijow poněčim balkanska rytmika. Jón dotal hišće live hrali njejsmy.
Sće sej tež wosebitych narodninskich hosći přeprosyli?
