Špatne wjedro w Brězowce sej njezwučene pěstowanje nałožka žadało
Brězowka/Slepo (ML/SN). W sydom wsach Slepjanskeje wosady bě bože dźěćetko lětsa dohromady 31 razow po puću a je dźěćom trójce wobličo pomajkało a dorosćenych ze swojim žiwjenskim prutom požohnowało. Starodawny nabožny nałožk skónči so štwórty adwent, a to tradicionalnje nawječor w Brězowce. Dokelž je so tón dźeń jara dešćowało, přetworichu wjesnjenjo jězdźidło na zakryty dźěćetko-mobil, w kotrymž sedźeše serbska mystiska postawa we wosebitej swjedźenskej drasće a ze zakrytym wobličom zhromadnje z přewodnicomaj w holčej drasće. Kaž w minjenych lětach bě Domowinjanka Arita Krawcowa Brězowske dźěćetko za to kaž tež do toho za wobradźenje na adwentničce Domowinskeje skupiny, pěstowarnje a rentnarjow zhotowała.