W politiskich debatach minjenych dnjow a demonstracijach přećiwo prawicarstwu mi něšto pobrachowaše, štož demokratiska towaršnosć nuznje trjeba: Wěcownosć. Wokomiknje so mi zdawa, zo mamy w našim kraju jenož hišće dwě skupinje ludźi: Dobrych a złych, demokratow a prawicarjow. Ludźi, kotřiž demokratiju zakituja, a tych, kotřiž chcedźa ju zničić.

Druhdy dwěluju, zo su woni zakitowarjo demokratije swój čas w šuli prawje kedźbowali, jako jim zasady demokratije rozkładźechu. Što woni poprawom měnja, hdyž demonstruja pawšalnje „přećiwo prawicarstwu“? Do demokratiskeho spektruma słušeja prawicarsce zmysleni a runje tak lěwicarscy. Na prawym boku stać, njeje ničo złe. Z wida prezidenta parlamenta sedźa tute strony na jeho prawej stronje: W Němskej su to CDU/CSU a AfD. SPD a Lěwica na tamnym.