Přiwisnicy FC Energije Choćebuz wjeselachu so pjatk na načolny duel w Saarbrückenje při wulkotnym nalětnim wjedrje a nadźijachu so wuspěšneho duela z towarstwom z Choćebuskeho partnerskeho města Saarbrückena.
Ale jako so hižo do hry powěsć wo podlěšenju zrěčenja roznjese, wubudźi to pola fanow FCE hoberske wjeselo. Na homepage FC Energije Choćebuz bu wozjewjene, zo šeftrenar Claus-Dieter Wollitz towarstwu po zakónčenju hrajneje doby 2024/25 dale jako trenar k dispoziciji steji.
Na wosebity wuznam termina wozjewjenja tutoho rozsuda pokaza koparska legenda VfL Bochuma Fabian Klos w pjatkownym interviewje w telewiziji. Klos praji, zo by towarstwo FC Energija Choćebuz we wuspěšnych tydźenjach hižo dołho kruće stejacy rozsud cyle prima mjez přiwisnikami roznjesć móhło. A doda, zo nětko, w tym wokomiku, hdyž je Choćebuz dwě hrě zasobu přěhrał, so wjednistwo FCE k Wollitzej wuznaje, zo by z nim tež do přichodneje sezony šoł. To pokazuje na jara dobru kwalitu zhromadneho dźěła wjednistwa towarstwa z trenarjom.
