20. hornjołužiske předewzaćelske myto do Kubšic, Biskopic a na Hory
Budyšin (SN/JK/at). Srjedźostawske předewzaća hraja wosebje w hospodarstwje wuchodneje Sakskeje wažnu rólu. Na wčerawšim srjedźostawskim dnju w Budyskim Němsko-Serbskim ludowym dźiwadle wuměnjachu sej zastupjerjo tajkich předewzaćow nazhonjenja, nawjazachu nowe styki a wožiwichu stare.
Skrótka prajene, wutworichu syće. W zarjadowanjomaj SpeedConnection a MiConnect so firmy mjezsobnje předstajichu a nawjazachu mnohe nowe kontakty. Dobry zakład to, zmištrować přichodne nadawki.
W přednoškach dnja zaběrachu so zastupjerjo předewzaćow a fachowcy z hospodarstwa a politiki wčera z narokami hospodarstwa a towaršnosće přichoda. Nimo wjetšich wužadanjow na hospodarskim, techniskim a inowatiwnym polu maja srjedźostawske předewzaća zmištrować demografisku změnu našeje towaršnosće.