Ratarjo maja so z mnohostronskimi wužadanjemi rozestajeć
Budyšin (SN/JK). Spočatk tydźenja su ratarjo z wulkej protestnej akciju w Mnichowje na rapidny spad mlokowych płaćiznow skedźbnili. Wina niskich płaćiznow je nadměrny poskitk mloka, po tym zo bě so kónc apryla wobmjezowanje mlokoweje kwoty skónčiło. Burja wočakuja, zo politika wotpowědnje reaguje. Žadaja sej, zo Europska unija minimalnu płaćiznu 40 centow na liter mloka zaruči.
Němscy burja maja so nimo płaćiznow mloka a druhich ratarskich wudźěłkow z dalšimi bytostnymi problemami rozestajeć. W prěnim rjedźe je to starosć, swoje produkty wotbyć. Sankcije Europskeje unije přećiwo Ruskej su so hižo loni negatiwnje wuskutkowali a lětsa hišće dale rozšěrili. Dotalnu škodu trochuje Němski burski zwjazk na 600 do 800 milionow eurow. Europska unija chce podobnje kaž loni ratarjam wupad embarga dla zarunać. Hač to za wšitke ratarske wudźěłki płaći, njeje znate, tež suma zarunanja nic.