W testowym wobchodźe pokazuja kreatiwnje zhotowjene wudźěłki

Kamjenc (JK/SN). Wožiwić a rozšěrić wobchody a přemysła w Kamjenskim srjedźišću je hižo dlěši čas zaměr prócowanja města Lessingoweho města a wotpowědnych iniciatiwow. Jedyn krok do tohole směra je wčera na Budyskej dróze wotewrjeny testowy wobchod, abo kaž so nowočasnje tež mjenuje testshop. Tule móža młodźi wobchodnicy z tak mjenowanych startup-předewzaćow swoje wudźěłki abo ideje k přijomnym kondicijam poskićeć.

Hladajo na to, zo je w centrumje Kamjenca dźeń a mjenje wotewrjenych wobchodow, je so tamniša cityjowa managerka Anne Hasselbach za wotpowědnej móžnosću rozhladowała, zajimcam poskićić móžnosć prezentacije.