Ratar je a wostanje powołanje z přichodom
Budyšin (SN/BŠe). Ratarske powołanje ma přichod. Tole wuchadźa z najnowšeho naprašowanja instituta Emnid w nadawku Němskeho burskeho zwjazka. Tak su so ratarjo porno naprašowanju w lěće 2012 nětko na druhe městno polěpšili a samo powołanje wučerja přesćahnyli. Po słowach prezidenta burskeho zwjazka Joachima Rukwieda leži to předewšěm na dobrym zjawnostnym dźěle. To wobkruća tež předsyda regionalneho burskeho zwjazka Budyšin-Kamjenc Stefan Triebs. „Přiwšěm dožiwja ludnosć wjesnych kónčin wěstu diskrepancu. Často šěrja medije nowosće, kotrež wobrazej ratarskeho powołanja škodźa. Ludźo na wsach pak wědźa, kajki wuznam burja maja“, wón wuswětla. Wosebje ći, kotřiž su wójnu dožiwili abo so po wójnje narodźili, su sej wědomi, kajki towaršnostny nadawk burja spjelnjeja.
