Hamor (AK/SN). W serbskej drasće su hosći při Bjerwałdskim jězoru přijeli. Marietta Mattitza, Linda Mächling, Tini Domel a Nico Domel z Wochozy witachu z chlěbom a selu wopytowarjow na wosebity wikowanski dźeń regionalneho wudźěłka. „Rady zarjadowanje podpěramy, wšako je to dobra přiležnosć, drastu pokazać a na serbske korjenje dopominać“, měni sobotu Hannelore Bartko, kotraž přisłuša předsydstwu Wochožanskeje Domowinskeje skupiny. „Smy jenička wjes Hamorskeje gmejny z Domowinskej skupinu. Runje tak jenička wjes, hdźež je serbska drasta hišće wobchowana a hdźež so ju woblěkamy.“