Rěčicy (SN/BŠe). Dźeń a raznišeje diskusije wjelka dla je kontaktny běrow „Wjelki w Sakskej“ ze sydłom na Rěčičanskim Erlichtec dworje wčera na nowinsku rozmołwu prosył a aktualne ličby rozpřestrěća předstajił. Mjeztym je po cyłej zwjazkowej republice 60 wjelčich črjódow a 18 porikow dopokazanych. Na aktualnym monitoringu za 2018/ 2019 tuchwilu dźěłaja. „Wjelče lěto dźě wot 1. meje do 30. apryla traje“, rozłoži wědomostnica Lupus-instituta za wjelči monitoring a slědźenje w Němskej Ilka Reinhardt. W lěće 1996 běchu prěnje pokazki na wjelka we Łužicy. Wot toho časa ličba pomału přiběraše, mjeztym pak wobkedźbuja fachowcy razantne wuwiće.
Zo je we Łužicy wjelča populacija wusko zasydlena, Ilka Reinhardt wobkrućić nochcyše. Po jeje słowach pytaja sej wjelki teritorij stajnje po tym, kelko cyroby tam nańdu. „Runje tak trjebaja wone wěsty schow, hdźež móža jich młodźata woměrje wotrosć“, wědomostnica wuzběhny. Wulkosće teritorijow w Europje chabłaja mjez 100 a 1 000 kwadratnymi kilometrami a rozeznawaja so jeničce po tym, kelko cyroby tam za cyłu črjódu je.
