Dźěłowe wiki w Hornjej Łužicy dale stabilne

wutora, 04. decembera 2018
artikl hódnoćić
(0 )

Budyšin (CK/SN). W Hornjej Łužicy bě w nowembru 17 842 bjezdźěłnych registrowanych. To je 20 mjenje hač měsac do toho. Tak je bjezdźěłnosć w regionje samo spočatk zymneho počasa hišće raz snadnje woteběrała, kaž rjekny tele dny Ilona Winge Paul. Ale tež prěnje přizjewjenja bjezdźěłnych, kotřiž sezony dla wupowědźenje dóstachu, dyrbjachu hižo zregistrować. Jednaćelka za operatiwne naležnosće Budyskeje agentury za dźěło skedźbnja na pjenjezy za krótkodźěło. Tónle instrument je so jako atraktiwna alternatiwa k pušćenju sobudźěłaćerjow wopokazał. Tak móža firmy přez zymu swojich fachowcow zdźeržeć. Kwota bjezdźěłnosće w Hornjej Łužicy cyłkownje wučinja 6,3 procenty. Rozdźěle pak sahaja wot 3,5 procentow w Kamjencu hač do 8,2 procentow w Běłej Wodźe. Z wulkim wotstawkom slěduje Zhorjelc z 10,8 procentami, jeničkej dwucyfrowej kwotu w dźěłozarjadniskim wobwodźe.

wozjewjene w: Hospodarstwo
Prošu přizjewće so, chceće-li komentar podać

nawěšk

nowostki LND